పోతురాజు గడ్డలో ఆగస్టు 8న వైభవంగా 108 కలశాభిషేక మహోత్సవం

ప్రొద్దుటూరులోని పోతురాజు గడ్డలో విశ్వహిందూ పరిషత్ ఆధ్వర్యంలో ఆగస్టు 8వ తేదీన 108 కలశాలతో మహా కలశాభిషేక మహోత్సవాన్ని ఘనంగా నిర్వహించనున్నారు. హిందూ ధార్మిక సంప్రదాయాలను పరిరక్షిస్తూ, భక్తుల్లో ఆధ్యాత్మిక చైతన్యం పెంపొందించేందుకు ఈ కార్యక్రమాన్ని నిర్వహిస్తున్నట్లు నిర్వాహకులు తెలిపారు.
ఈ సందర్భంగా ఉదయం 6:30 గంటలకు మహిళలతో శోభాయాత్రగా కలశయాత్ర ప్రారంభమై, అనంతరం ఉదయం 7 గంటలకు పోతురాజు గడ్డ వద్ద 108 కలశాలతో ప్రత్యేక అభిషేకం, పూజలు, వేద మంత్రోచ్చారణల మధ్య మహోత్సవం నిర్వహించనున్నారు. కార్యక్రమంలో పండితుల ఆధ్వర్యంలో ప్రత్యేక పూజలు, భక్తుల సంక్షేమం కోసం ప్రార్థనలు జరగనున్నాయి.
పోతురాజు గడ్డ అభివృద్ధి, ఆధ్యాత్మిక వైభవాన్ని మరింత పెంపొందించే లక్ష్యంతో నిర్వహిస్తున్న ఈ మహోత్సవంలో మహిళలు, యువత, భక్తులు అధిక సంఖ్యలో పాల్గొని కార్యక్రమాన్ని విజయవంతం చేయాలని నిర్వాహక కమిటీ విజ్ఞప్తి చేసింది. ఈ మహోత్సవంలో పాల్గొని స్వామివారి ఆశీస్సులు పొందాలని భక్తులకు పిలుపునిచ్చారు.