పులివెందులలో సీఎంఆర్ఎఫ్ చెక్కుల పంపిణీ.. 33 మంది లబ్ధిదారులకు రూ.24.53 లక్షల సాయం

పులివెందుల, ఆగస్టు 5: పేద ప్రజలకు మెరుగైన వైద్య సేవలు అందించడంలో కూటమి ప్రభుత్వం ప్రత్యేక శ్రద్ధ చూపుతోందని ఎమ్మెల్సీ భూమిరెడ్డి రామగోపాల్ రెడ్డి తెలిపారు. పులివెందులలోని తన నివాసంలో ముఖ్యమంత్రి సహాయనిధి (సీఎంఆర్ఎఫ్) కింద మంజూరైన చెక్కులను లబ్ధిదారులకు ఆయన పంపిణీ చేశారు.
ఈ సందర్భంగా మొత్తం 33 మంది లబ్ధిదారులకు రూ.24.53 లక్షల విలువైన సీఎంఆర్ఎఫ్ చెక్కులను అందజేశారు. అనారోగ్యంతో బాధపడుతున్న నిరుపేద కుటుంబాలకు ఆర్థిక భరోసా కల్పించేందుకు ప్రభుత్వం సీఎంఆర్ఎఫ్ ద్వారా సకాలంలో సహాయం అందిస్తోందని ఎమ్మెల్సీ పేర్కొన్నారు.
అత్యవసర వైద్య చికిత్సలు, శస్త్రచికిత్సల కోసం ఇబ్బందులు ఎదుర్కొనే కుటుంబాలకు ఈ సహాయం ఎంతో ఉపయోగపడుతుందని ఆయన అన్నారు. ప్రజల ఆరోగ్య సంరక్షణ, సంక్షేమమే ప్రభుత్వ ప్రధాన లక్ష్యమని, అర్హులైన ప్రతి ఒక్కరికీ ప్రభుత్వ సంక్షేమ పథకాల ఫలాలు అందేలా చర్యలు కొనసాగుతున్నాయని తెలిపారు.
ఈ కార్యక్రమంలో స్థానిక ప్రజాప్రతినిధులు, పార్టీ నాయకులు, లబ్ధిదారులు, వారి కుటుంబ సభ్యులు పాల్గొన్నారు.