పులివెందుల, అక్టోబర్‌ 16: పులివెందుల మున్సిపల్‌ ఎన్నికల నామినేషన్ల ప్రక్రియ తొలి రోజు ప్రశాంతంగా ముగిసింది. వైఎస్సార్‌సీపీ చైర్‌పర్సన్‌ అభ్యర్థి వైఎస్‌ ప్రమీలమ్మతో పాటు పలువురు కౌన్సిలర్‌ అభ్యర్థులు నామినేషన్లు దాఖలు చేశారు. ఎలాంటి అవాంఛనీయ ఘటనలు చోటుచేసుకోకుండా ప్రక్రియ సజావుగా సాగడంతో రాజకీయ వర్గాల్లో ఊరట వ్యక్తమైంది.
నామినేషన్ల సమయంలో అభ్యర్థులకు ఆటంకాలు ఎదురయ్యే అవకాశం ఉందంటూ గతంలో ప్రచారం జరగడంతో ఉత్కంఠ నెలకొంది. అయితే తొలి రోజు నామినేషన్లు ప్రశాంతంగా సాగడంతో ఎన్నికల ప్రక్రియ కూడా ఇదే విధంగా కొనసాగుతుందనే ఆశాభావం వ్యక్తమవుతోంది.
ప్రజల ఆశీస్సులతో విజయం సాధిస్తాం: ప్రమీలమ్మ
నామినేషన్‌ అనంతరం వైఎస్సార్‌సీపీ చైర్‌పర్సన్‌ అభ్యర్థి వైఎస్‌ ప్రమీలమ్మ మాట్లాడుతూ, నామినేషన్ల ప్రక్రియ ప్రశాంతంగా ముగియడం సంతోషంగా ఉందన్నారు. రానున్న ఎన్నికలు కూడా ప్రశాంత వాతావరణంలో సాగుతాయని ఆశిస్తున్నట్లు తెలిపారు. ఎన్నికల ప్రచారానికి ఎలాంటి ఆటంకాలు కలగకుండా పోలీసులు తగిన చర్యలు తీసుకోవాలని కోరారు. ప్రజల ఆశీస్సులతో విజయం సాధిస్తామని ధీమా వ్యక్తం చేశారు.
