ప్రొద్దుటూరు: రానున్న స్థానిక సంస్థల ఎన్నికలను దృష్టిలో ఉంచుకుని వైఎస్సార్‌సీపీ శ్రేణులు కార్యాచరణకు సిద్ధమవుతున్నాయి. ఇందులో భాగంగా ఆ పార్టీ రాష్ట్ర అధికార ప్రతినిధి రాచమల్లు శివప్రసాద్‌రెడ్డి ప్రొద్దుటూరు, రాజుపాలెం మండలాల నాయకులు, కార్యకర్తలతో ఆత్మీయ సమావేశం నిర్వహించారు.
రెండు మండలాల పరిధిలోని 15 గ్రామ పంచాయతీలు, 24 ఎంపీటీసీ, రెండు జెడ్పీటీసీ స్థానాలకు చెందిన నాయకులతో ఎన్నికల సన్నద్ధత, పార్టీ బలోపేతంపై చర్చించారు. గ్రామస్థాయిలో పార్టీని మరింత బలోపేతం చేయడం, నాయకులు–కార్యకర్తల మధ్య సమన్వయం పెంచడం, ప్రజల్లోకి పార్టీ కార్యక్రమాలను తీసుకెళ్లడంపై దృష్టి సారించారు.
ఎన్నికల సమయం దగ్గరపడే వరకు వేచి చూడకుండా ఇప్పటి నుంచే ప్రణాళికాబద్ధంగా పనిచేయాలని రాచమల్లు సూచించారు. స్థానిక పరిస్థితులను అంచనా వేసుకుంటూ, సమష్టి కృషితో ఎన్నికల కార్యాచరణను ముందుకు తీసుకెళ్లాలని పార్టీ శ్రేణులకు పిలుపునిచ్చారు.
