ప్రొద్దుటూరు: గంజాయిని అక్రమంగా విక్రయిస్తున్న ఓ వ్యక్తిని ప్రొద్దుటూరు వన్‌టౌన్ పోలీసులు అరెస్ట్ చేశారు. నిందితుడి వద్ద నుంచి 50 పొట్లాల్లో ఉన్న 385 గ్రాముల గంజాయిని స్వాధీనం చేసుకున్నారు. దీని విలువ సుమారు రూ.8 వేలు ఉంటుందని పోలీసులు తెలిపారు.
పోలీసుల వివరాల మేరకు.. పట్టణంలో గంజాయి అక్రమ విక్రయాలపై నిఘా ఉంచిన క్రమంలో అందిన సమాచారం ఆధారంగా బుధవారం సాయంత్రం పోలీసులు తనిఖీలు చేపట్టారు. ఈ సందర్భంగా అనుమానాస్పదంగా ఉన్న వ్యక్తిని అదుపులోకి తీసుకుని తనిఖీ చేయగా గంజాయి బయటపడింది. దీంతో గంజాయిని స్వాధీనం చేసుకుని నిందితుడిని అరెస్ట్ చేశారు.
ఈ ఘటనపై ఎన్‌డీపీఎస్‌ చట్టం కింద కేసు నమోదు చేసి దర్యాప్తు చేపట్టారు. పట్టణంలో మాదకద్రవ్యాల అక్రమ రవాణా, విక్రయాలను అరికట్టేందుకు నిఘా మరింత ముమ్మరం చేస్తామని పోలీసులు తెలిపారు. గంజాయి విక్రయాలు, రవాణాకు పాల్పడే వారిపై కఠిన చర్యలు తీసుకుంటామని హెచ్చరించారు.
ఈ దాడిలో వన్‌టౌన్ సీఐ టి.వి. కొండారెడ్డి, ఎస్‌ఐ మధుసూదన్ రెడ్డి ఆధ్వర్యంలో పోలీసు సిబ్బంది పాల్గొన్నారు. మాదకద్రవ్యాల నిర్మూలనకు ప్రజలు పోలీసులకు సహకరించాలని, గంజాయి విక్రయాలకు సంబంధించిన సమాచారం ఉంటే వెంటనే పోలీసులకు తెలియజేయాలని అధికారులు కోరారు.
